唔做大嘥鬼 環署推食肆回收玻璃樽

【明報專訊】環境保護署今個月起推出「乾杯暢飲 盡情回收」計劃，喺14個大型商場同商廈推動食肆自願回收玻璃樽，希望佢哋唔好做「大嘥鬼」。


14大型商場商廈推行

環境局長黃錦星出席計劃啟動禮時話，香港每日產生嘅290噸廢棄玻璃樽，有三分之二嚟自工商業場所，但現時環保署嘅玻璃樽回收點都係喺屋苑，所以希望透過回收計劃，將網絡擴展到食肆，提高整體回收率。


回收樽會再造建築物料

參與食肆會分類回收同集中存放廢棄玻璃樽，由環保署委聘嘅承辦商收集之後，會循環再造成建築物料，如環保行人路磚。環保署日後擬逐步擴展到更多商場。


黃錦星話政府會帶頭完善同推動回收，包括喺回收玻璃樽嘅車隊安裝全球定位系統（GPS），確保佢哋將玻璃樽送到合資格回收場，而政府部門亦會喺建築工程上，採用由廢棄玻璃樽循環再造嘅物料。


另外，立法會今個禮拜五將審議《促進循環再造及妥善處置（產品容器）（修訂）條例草案》，草案建議將產品容器納入「生產者責任計劃」，黃錦星話政府目標係喺今個立法年度通過法例。