候選人遲申請 新社聯logo無得補印

【明報專訊】下月就係區議會選舉，最近候選人開始檢視屆時投票用嘅選票資料。Emily聽聞有部分獲新界社團聯會（新社聯）支持嘅候選人，因為之前無向選舉管理委員會申請，喺選票上印上新社聯標誌，家有人發現咗，想喺選票上印番標誌都唔得，因為過咗申請期限無得補印。


突想加標誌 趕唔切

新社聯副總幹事李世榮同Emily講，有部分候選人被提名時，因為各種原因未有申請喺選票上印上新社聯標誌，但呢幾日候選人做緊核實選票嘅工序，有人突然想加番標誌，但趕唔切。至於有咩原因要加番標誌，李世榮話人人唔同，亦有候選人因為唔熟悉呢啲選舉細節而錯失咗申請機會，但佢話手上無呢啲候選人嘅名單。


李世榮已報名參選沙田耀安區，同區有無黨派張碧霞。