否認讓路 郭振華因身體「結構」問題唔選

【明報專訊】經民聯噚日喺美孚舉行區選造勢會，成員郭振華（圖）都有出席，不過做咗超過20年深水埗區議員嘅佢，就唔再係以候選人身分現身，因為佢喺今屆唔會競逐連任。


郭振華話自己唔選純粹係個人決定，否認外間傳聞指佢係避免同自由黨競爭而要協調避選，所以堅持話自己唔係「讓路」；自己因為年紀唔輕，身體亦出現咗「結構性」問題，聲線都變咗，所以要多啲時間休息咁話。


估李梓敬勝算較大

郭振華又一村選區嘅席位，將會由自由黨青年團主席李梓敬，同社民連嘅周嘉發競逐，郭振華無透露自己支持邊個，話「講咗你哋又會寫嘢」，但都認為李梓敬嘅勝算較大，因為又一村多中產選民之餘，自由黨亦喺當區做咗較長時間嘅地區工作。


郭振華係現任深水埗區議會主席，佢引退之後有無心水繼任人選呢？雖然佢都係無講，不過就話做主席，有較多區議會經驗始終會有幫助。