蔣麗芸推動實習 怕後生仔入錯行

【明報專訊】唔少人成日話香港嘅後生仔唔知自己做緊乜嘢，或者由父母安排好人生嘅一切，眼見年輕人對人生好似好迷茫咁，民建聯立法會議員蔣麗芸（Ann姐）於是都想幫年輕人起飛，話計劃推動職業教育生涯規劃，希望可以叫政府同工商企業合作，為中學生提供各行業嘅實習機會，幫助年輕人選擇合適自己嘅工作，避免入錯行。


笑稱唔介意網民抽水

Ann姐噚日同傳媒飯敘時講到自己進入議會嘅目的之一，就係推動年輕人生涯規劃，所以今日會喺立法會大會提出「強化職業教育」嘅動議。Ann姐話，後生仔搵工最緊要搵自己感興趣嘅工作，仲透露佢侄仔嘅興趣係做酒保，最近仲去咗韓國發展。


講起年輕人，Ann姐都知自己不時會被年輕網民抽水同取笑，但佢話一啲都唔介意，覺得自己可以帶畀人歡樂，係一件好事。Ann姐仲話平日自己有良好待人接物態度，又學林鄭月娥口脗，講笑話天堂都留咗個位畀佢喎。