fb月出30帖 警隊19人搞社交媒體

【明報專訊】香港警察上月開咗facebook帳戶，咁要幾多人手去搞呢？答案係19人！咁一個月出咗幾多個post呢？答案係30條。換言之，平均1日出1條，每人每月寫1.58條。不過，數唔係咁計嘅，網媒100毛嘅創辦人林日曦就講「公道話」，計過警方人手，同佢哋100毛fb及毛記電視加埋差唔多，而拍片搞post呢啲嘢，人手需求好難講嘅，話警隊製作睇嚟似「荷李活級數」，點可以拎嚟同佢哋呢啲細台比較呢！


影片同post質素難比較，咁數量可以吧。警察一個月出30個post，而林日曦話佢哋專職睇住fb嘅admin有5至6人，一星期出300個post左右啦。佢話拍片出post可以係Hollywood、可以係Bollywood，亦可以係學生製作，如以警隊人手去睇，一定係搞緊荷李活製作！林日曦話近期少睇警察fb，話淨係sell許sir無新鮮感，提議應搵啲明星級人物，例如七警做嘉賓咁先搶到like！


署理保安局長李家超書面答覆「長毛」梁國雄提問時就話，成立一個由一名警司帶領嘅19人新組別。呢隊人手要搞社交媒體，包括「警隊流動應用程式」、「警隊YouTube頻道」及「警隊facebook」嘅發展，仲話要負責同傳媒聯絡。李家超就講唔到花咗幾多錢搞社交媒體，但唔知審計署會唔會衡工量值一下，咁嘅人手資源，一個月出30個post，賺到48,000個讚好，咁算唔算符合成本效益呢。