「超級聯繫人」被潑冷水

【明報專訊】阿爺可能都有自知之明，知道搞親「X中全會」、「第N個五年規劃」，都一定係票房毒藥，早前五中全會舉行之際，突然爆出一段網上短片宣傳「十三五規劃」，呢首以美國風格包裝嘅「十三五之歌」雖然旋即走紅，但始終都係無法令票房毒藥起死回生，「十三五規劃」除咗廢除「一孩政策」一項外，可謂無乜引起太大關注，就連最緊跟中央路線嘅梁特，都未見佢出嚟擦吓鞋。


無論係「十三五」抑或「一帶一路」，雖然到目前都只係得個「噏」字，但就係因為得個「噏」字，最適合愛港愛國人士用嚟賣口乖，表達忠誠，所以最近有關「一帶一路」嘅研討會同午餐會，幾乎每星期都有幾場，筆者星期一都有去一場，演講內容當然非常沉悶，但想唔到會後傳媒訪問有趣事發生。


愛國之士賣口乖 政策研討會多籮籮

話說論壇請咗國家發改委嘅西部司巡視員歐曉理做講者，佢被問到香港在國家「一帶一路」戰略之中，能夠如梁特話齋，擔當「超級聯繫人」。怎知道呢位歐先生不單止無打官腔，仲直接提出質疑，話「一帶一路」沿線國家好多都唔係用西方手法做生意，佢對於「超級聯繫人」呢個概念能否落實抱有懷疑咁話。其實梁特口中嘅所謂「超級聯繫人」，都係吹水大於實質意義，內地官員畀吓面香港特首，同記者搓吓波其實無乜所謂，但呢位歐先生竟然當眾落梁特面，呢個係筆者覺得最值得玩味嘅！


《十三五規劃建議》隻字未提

梁特自從上台之後，無時無刻不提醒全世界佢「適度有為」，仲24小時「超級聯繫人」上身。呢個世界最鍾意口號嘅政客，一定係老共：毛澤東思想、鄧小平理論、「三個代表」、科學發展觀，到習近平嘅「四個全面」，領導人嘅口水，全部都寫晒入國家憲法，成為政客們自high嘅legacy，百分百中共特色，如今梁特都要喺香港玩呢一套。


試想想，如果梁特自稱自創嘅「超級聯繫人」，被阿爺寫入「十三五」規劃之內，不單止會成為梁特本人嘅政治legacy，一定又會被梁特和一眾梁粉大做文章，大力吹響連任號角。但如今，不單止《十三五規劃建議》內隻字不提「超級聯繫人」，負責國家規劃嘅發改委高層仲要直接提出懷疑，結果可謂天壤之別，最識玩文字政治遊戲嘅中國共產黨，事前不可能沒有想到這一步的政治效果。


「攞命陳」京出席論壇攞分

但係在北大人極度重視經濟之時，「超級聯繫人」都要有一定財金知識。梁特近日有一豪語，實在難以認同，話說金管局總裁陳德霖日前出席立會會議時話，一旦樓市下行周期形成，金管局將減辣，如適度放寬按揭成數限制，又指加息並非減辣唯一考慮；但梁特其後主動談及樓市問題，指為針對影響樓市需求因素，港府推出雙辣招已成功遏抑外來需求、炒賣需求和投資需求，又話陳德霖評論完全是從金融市場穩定、金融機構安全和穩定角度出發，與港府不同，因港府要兼顧市民住屋需要及購買能力等；咦！難道首長就不用顧及市場穩定？呢兩日咁啱北京有個財經論壇，主辦方係王岐山老友《財新傳媒》的胡舒立，聽聞同王岐山關係好嘅「攞命陳」也會出席；呢個論壇有好多內地財金高官和猛人出現，應該係攞命陳「攞分」之時﹗


[應正亮 廿四味]