「喜見」流會 林鄭興奮轉場 話水上樂園係集體回憶

【明報專訊】噚日朝早嘅立法會流會，建制派同要求點人數嘅「長毛」梁國雄互相指摘，不過「官到無求膽自大」嘅政務司長林鄭月娥就竟然話「喜出望外」，點解呢？因為佢唔使坐立法會，可以去到「心愛嘅海洋公園」，出席海洋公園新水上樂園動工典禮囉！

林鄭致辭時話，朝早10點鐘之前都以為無辦法到海洋公園，「就算議員唔拉布，都會歷時5至6小時嘅辯論」，所以一早委託咗商務及經濟發展局長蘇錦樑「代班」。點知立法會因人數不足流會，林鄭好坦白話，「（流會）一般會失望，但今次我係喜出望外」，台下嘉賓拍晒手掌。


被傳任副創科局長 鳴煒未回應

不過，司長隨即補多句，話呢個係「個人立場」，「特區政府嘅立場仍然係表示失望」。林鄭仲話，水上樂園係港人集體回憶，期望新水上樂園可以提升海洋公園吸引力同本港嘅旅客接待能力。


海洋公園副主席、剛卸任華置主席嘅劉鳴煒都有出席典禮，林鄭致辭時仲親切地叫佢做「鳴煒」。Emily好想問「鳴煒」被傳將會出任創科局副局長嘅心情，可惜佢完咗典禮即急急腳走人。