禮賓府開放 CY細路唔答提問

【明報專訊】禮賓府噚日開放畀公眾參觀，有人朝早7點半就到場排隊，特首梁振英（CY）同太太梁唐青儀就喺早上10點半現身禮賓府花園，引嚟唔少人同佢哋握手，不過被網民戲稱為「香港公主」嘅特首女兒梁齊昕就無現身喇。CY同公眾接觸，主要同細路仔傾吓偈，好似問吓佢哋住邊同幾多歲，仲問有無睇香港足球隊比賽咁，但Emily同啲行家叫破喉嚨問CY一啲熱門事件，好似幾時會委任港大校委會主席，CY就充耳不聞無答到。


偕梁太現身 不見齊昕

Emily見最近梁振英玩facebook不時分享種花心得，仲期待佢會同市民介紹吓禮賓府嘅植物，不過佢只現身十幾分鐘，傍晚佢就同有份幫手嘅制服團隊、公務員同事合照，不過Emily只能透過CY fb睇相喇。噚日朝早CY亦喺禮賓府，同美國眾議院民主黨領袖佩洛西率領嘅訪港代表團會面。


女長毛舉黃傘示威被請離

雖然無機會同特首講嘢，不過有市民同Emily反映對特首施政嘅意見。70歲嘅陳女士覺得社會好多紛爭，希望CY處理港大校委會風波唔好太意氣用事。30幾歲嘅楊先生就希望CY多聽民意，對政府就擴建星光大道缺乏諮詢覺得失望。而有「女長毛」之稱嘅社運常客雷玉蓮，噚日喺禮賓府高舉黃傘示威，高呼「梁振英下台」，結果被請離場。