劉偉德撼陳捷貴 自喻歌利亞

【明報專訊】區議會選舉今個月22號投票，各政黨同候選人加緊宣傳，仲搵嚟政圈同社會名人造勢。公民黨前立法會議員吳靄儀噚日喺中西區般咸道，為大學選區候選人劉偉德站台；般咸道早前有4棵百年石牆樹突然被斬，引起社會熱議，吳靄儀話自己住喺該區超過20年，見到4棵老樹一下子無咗好痛心，所以希望支持一個做好地區工作、兼唔會「盲目斬樹」嘅候選人。劉偉德就話自己係「不甘受壓的青年」，形容自己以「歌利亞」姿態，挑戰同區「巨人」、現任區議員陳捷貴。


吳靄儀撐唔會盲斬樹候選人

民建聯噚日亦喺堅尼地城連開兩場造勢會。喺觀龍擔任多年區議員嘅葉國謙，將會交棒畀黨友楊開永，阿謙話民建聯正步向「逐步換代」，佢希望畀機會後輩，又話對楊有「101%信心」，認為楊嘅優勢係過去幾年一直有做地區工作。楊開永就話接棒雖然大壓力，但都希望不負「師父」所託。楊對手為青年新政梁頌恆。


葉國謙交棒徒弟 有「101%信心」

同新民黨合併嘅公民力量噚日亦喺沙田舉行造勢會，仲請嚟「肥媽」Maria Cordero撐場，為一眾候選人打氣。新民黨副主席潘國山話希望守住公記原本19席嘅基本盤，喺呢個基礎上再努力，向支持者做個交代咁話。


「10A港姐」麥明詩嘅男友林作喺黃大仙龍星出選，噚日再次搵嚟才子陶傑一齊拉票。林作同區有岳敬寬、前綫譚香文同何偉權出選。