有話說﹕鋼琴唔係樂器！？

【明報專訊】近排陸陸續續有中學舉行中一入學簡介會，老死聽咗幾場之後，忍唔住打電話嚟同Happy Mama大吐苦水。老死之所以咁勞氣，係因為好多學校講到明，喜歡取錄有音樂才華嘅學生，甚至會喺面試時設立音樂測試，但基於彈鋼琴「太普及」，因此不會列在計分項目。


學琴太普及 升中面試不計分

近年愈來愈多學校推行「一人一體藝」，莫講中學，小學亦如是。老死個女間小學亦有類似計劃，但就無規定「藝」要學啲乜，所以，佢就幫個女揀咗鋼琴，而小朋友亦學得唔錯，小六已經考獲五級。但勢估唔到，原來家好多中學根本唔當鋼琴係樂器，換句話說，老死個女縱使有五級鋼琴成績，仍然係無一技之長！不但對中一面試毫無幫助，他日升上中學，亦要轉學其他樂器。


Mama早幾日有機會同「音樂兒童基金會」創辦人胡龐倩渝傾開呢個話題，佢都好激動，胡太指出，香港好奇怪，就算原意幾咁好嘅教育政策，一旦落到地就會被完全扭曲；仲話家正等緊家長好似引爆TSA咁，引爆呢個樂器「等級」論。


胡太係香港出色嘅鋼琴家，曾經喺名校做音樂課程總監，見盡學校點樣為壯大樂團，用盡威逼利誘嘅方法，點名分配學生學指定學器，完全唔理佢哋有冇興趣、有冇天分。胡太唔想違背良心，於是毅然辭職，仲成立基金會，免費去教一班真心想學樂器但無錢嘅基層兒童。


5歲仔學法國號 還享受嗎？

胡太批評，香港不論係校方或家長，對學樂器都抱超錯觀念，以為愈細個學愈好、愈冷門愈好。佢話有同行遇見過有媽媽要求5歲仔仔學法國號，須知法國號被喻為世界上最難吹奏嘅樂器，幾歲人仔，連嘴巴、牙齒都未發育得好，加上件樂器又鬼咁大，5歲仔根本無可能學得到。


講到尾，胡太都係再三強調，唔好將樂器「分級」，唔係學某種樂器就叻啲，學另一種樂器就無咁叻。反之，應該因應小朋友本身嘅興趣去選擇學乜嘢樂器，否則，孩子非但唔享受，仲會覺得難受，令音樂成為佢哋學業上嘅另一種負擔。