見特首 勞工政策「追數」 工聯﹕CY有心想撤積金對冲

【明報專訊】各大政黨陸續同特首梁振英（CY）見面，提交施政報告同財政預算案嘅建議。工聯會噚日就同CY見面兼「追數」，希望下年公布嘅施政報告，落實取消強積金對冲、統一法定假期同公眾假期日數，以及立法訂定標準工時等政策。工聯會會長林淑儀話，會努力爭取CY落實勞工政策，「追到天腳底都會追」。林淑儀仲話同CY見面時，感覺到CY係有心想取消強積金對冲，但對方並無實質承諾。


但話無實質承諾

除咗勞工政策，工聯會仲建議咗一系列政策，喺房屋方面希望政府可以就新租務管制諮詢公眾，以及為合資格上樓、已輪候3年公屋嘅申請人提供租金津貼。至於旅遊方面，工聯會要求政府成立旅遊業監管局，統一監管導遊、領隊同旅行社。


身兼標準工時委員會勞方代表嘅工聯會吳秋北話，委員會嘅討論雖處膠着狀態，但強調會盡力爭取，講明勞工界唔會接受只透過合約去解決有關問題。