迎合低頭族 范國威推電話型傳單

【明報專訊】唔少區議會選舉候選人都希望出奇制勝，新民主同盟范國威（圖）直情向街坊免費派「智能電話」。大家唔好諗多咗以為有人光天化日下賄選，范國威只係仿照智能電話嘅外形同版面，設計選舉傳單。范國威話好多時向街坊派傳單時，街坊多數只顧低頭玩手機，匆匆行過唔會接，為咗迎合低頭族，就設計出「電話型」傳單。


設計師出身嘅范國威設計嘅「電話傳單」除咗介紹政綱，仲用模仿WhatsApp版面嘅設計，內容都係反駁抹黑，話雖然新人好似好勤力，但現任議員有幾十年地區工作嘅汗水，係有經驗同往績；又模仿YouTube版面，介紹范國威喺立法會嘅發言同工作。


范國威已經報名參選西貢運亨區競逐連任，同區對手有申偉基同黎子華。