公民黨讓路 民主黨「爭」贏年宵攤位

【明報專訊】噚日年宵攤位競投第二日，發生公民黨同民主黨「爭位」事件。話說公民黨去年喺維園18號乾貨攤位擺檔，但民主黨今年都想要番呢個位，結果喺競投過程中叫咗十幾個價位，終於由民主黨以4.65萬蚊投得。公民黨其後以噚日乾貨攤位最高價7.45萬，投得42號攤位。


喺現場代表公民黨競投嘅總幹事余冠威就同Emily講，無同民主黨爭，主要覺得無謂「大家都用高成本」，決定讓路，最後又決定出重本，用7.45萬投咗近維園出口嘅42號檔。代表民主黨競投嘅民主黨中常委黎敬瑋就話，前年都係用18號檔，但舊年改投另外兩個相連攤位，今年因人手關係想縮番做一個，故心儀18號檔。


至於每年都會喺維園擺檔嘅支聯會，合共以5.95萬元投得1號同2號攤位，低過舊年9.55萬，「慳番」3萬幾蚊。支聯會副主席蔡耀昌話今年有新產品，係印有民主女神、王維林擋坦克車等圖案嘅透明水杯，斟滿水之後圖案就會變大，象徵群眾透過參與同努力，係可以對抗專制咁話。