今屆毅行者 盼支持尼泊爾震後重建

【明報專訊】一年一度嘅「樂施毅行者」將會喺今個月20至22日舉行，為樂施會喺世界各地推行嘅扶貧、救災同發展倡議項目籌款。今年初尼泊爾發生大地震，當地損失嚴重，樂施會話毅行者同尼泊爾淵源深厚，因為活動喺1980年代開始辦，原本就係駐港啹喀兵嘅訓練活動，所以樂施會今年都希望籌到更多款項，支持當地救災重建工作。


陳智思約梁錦松行短路線

毅行者今年有超過5000人參加，參賽者4人一隊，要喺48小時內行完100公里路程，包括麥理浩徑同其他路段，亦要翻越20幾座高山，少啲毅力都唔得。樂思毅行者籌委會主席陳智思（右四）話，今年已經約咗前財政司長梁錦松參加，但兩人身體未必應付到全程，所以會行短啲嘅路線。


毅行路線貫穿郊野公園，身兼團結香港基金顧問嘅陳智思亦回應基金會提出開發郊野公園土地起樓嘅議題，佢話香港面對兩難，社會要討論點喺住屋環境同開發土地之間取捨，因為「無可能樣樣都有」。對於有意見認為應該用高球場土地起樓，陳智思就話即使用高球場地起樓，都唔能夠解決所有問題。