郭家麒問點同CY做fb朋友

【明報專訊】特首梁振英（CY）早前開設咗個人facebook戶口，不過唔係「朋友」就無得留言，普通網民想同CY交流都唔係咁容易。噚日嘅立法會大會上，公民黨郭家麒就問點樣先可以同CY喺fb做朋友，話梁振英當選特首後「唔見咗支筆，唔見咗張櫈」，家連留言都無，質疑對方如果無朋友，點樣爭取連任呢？


劉江華﹕戶口由特首辦管理

負責回應嘅民政事務局長劉江華，話CY喺fb分享生活同工作體會係「不拘一格」，相信佢會用唔同方式處理帳戶，但就無答到點樣先可以「add」CY做朋友。劉江華又話政府應用新媒體仲處於探索階段，會邊用邊學，亦會參考外國政治領袖嘅做法，希望加強同市民溝通，而佢又承認，CY嘅fb戶口係由特首辦負責管理。咁特首辦幫特首搞fb，會牽涉公帑開支，納稅人又使唔使額外畀錢呢？劉江華就話管理fb用嘅都係現有資源。


工業界議員林大輝就問政府，特首fb無邀請所有香港政要做朋友，會唔會擔心影響各界團結；呢條問題劉江華無正面回應，只係話政府重視社交媒體工作，希望收集更多市民意見咁話。