【明報專訊】大小選舉臨近，個個都話搞智庫。這邊廂董建華成立團結香港基金，那邊廂曾鈺成又話做完立法會就專心搞智庫，林建岳都搵咗文匯報一班舊人搞咗個文化協進智庫。但其實大家都明白，所謂智庫，其實都係研究為名，「抬轎」為實，雖然特首跑馬仔連「馬名」都未齊，但各路人馬為怕執輸，爭相搭台造王。
搞得智庫，當然要有研究，江湖傳聞董建華敲咗唔少有錢腳骨，當然要有功課交，先至可以向各位金主交代，基金會日前終於推出首份研究報告，建議以可租可買的「補貼置業計劃」，取代目前嘅公屋同居屋計劃，仲聲言要以八成家庭置業為目標。
王于漸賣公屋建議 早已出書
呢個建議聽起嚟相當大膽，但其實如果認識建議嘅倡議者王于漸，就應該知道今次呢條橋其實唔算新，佢老人家早喺N年前已經倡議政府賣公屋，仲出過一本書叫做《公屋私有化評論》，如今團結香港基金搵佢過橋出報告，其實都只係「炒冷飯」。而所謂「八成家庭置業標」，道理亦相當簡單，目前全香港差不多四成家庭係業主，四成住公屋，其餘租樓，如果賣晒啲公屋，四成加四成咪八成囉，如果政府明日宣布將所有公屋免費送晒畀租客，立即達標！
租公屋太筍 住戶無意當業主
房委會其實喺1998年都有推過賣公屋計劃「租者置其屋計劃」（Tenants Purchase Scheme，簡稱TPS），但一直以嚟反應唔算熱烈，無它，公屋租金實在太平，目前平均係1700蚊，居民唔使交管理費又唔使交差餉，大小維修又係政府揹晒，試問有咁筍嘅優惠，又有幾多住戶想喺同一居住環境下，由租客變身做業主？
喺咁嘅背景底下，要吸引佢哋買咗自己間屋，唯一嘅可能性就係有着數，買家將來可以透過賣樓賺番筆，所以王于漸嘅提議就提出喺地價上提供優惠，但同時又要設限，買樓後首五年不能租售。筆者相信，對於新建資助房屋，呢條橋或許有吸引力，但對於現有公屋租客，吸引力就真係好一般，而往後同一屋苑內同時存在業主跟租客，管理、維修等一連串問題如何解決？建議當然沒有講，筆者明知報告吹水成份高，當然係毋須深究﹗
梁特做到的 梁錦松也做得到
筆者有興趣的，是為何團結香港基金會選一碟「冷飯」做頭炮。事實上，單憑日前各大傳媒的重視和大肆報道，可見房屋土地問題在目前香港絕對有市場，同一題目，同是當年梁特競選主打路線，如今團結香港基金以土地房屋政策製造民間聲音，似乎係以子之矛攻子之盾，為另一隻馬梁錦松鋪路，阿松在同一時間提出削郊野地改建房屋，擺明互相呼應﹗呢個部署，唔通係同北京講，梁特標榜做到的事，梁錦松也做得到﹗值得留意的是，阿董極力巴結兼團結香港基金幕後大金主馬雲，傳聞話佢會買南華早報，呢份曾被視為梁粉之一的報章，會否隨易主而轉向？拭目以待。
[應正亮 廿四味]
新聞類別
財經
詳情#
留言 (0)
