內地媒體敏感字庫流出

【明報專訊】自由亞洲電台網站噚日刊登一篇訪問稿，流亡印度嘅南都網前編輯李新受訪爆料，展示聲稱喺兩年前拍攝嘅南都網新聞審查嘅「敏感字列表」截圖，訪問之中，李新話字列表有成幾萬字列為「敏感」。


電影名領導人「豪哥」等皆敏感

六四、法輪功等政治字眼列做敏感可以理解，令人費解嘅係一啲可能似係電影名，好似「情不自禁」、「四度誘惑」，以至一啲人名，例如領導人嘅名，以至平民百姓名「豪哥」都係「敏感」。


Emily求證唔到，亦唔能夠理解呢份「敏感字列表」，但報道就話，李新話呢份列表2013年佢喺南都網工作，睇到一般人員無權限瀏覽嘅敏感字列表，於是將畫面拍下。


報道話，南都網嘅後台係廣東省委宣傳部網絡處，呢個部門會頻繁發出「全部刪除」、「不得轉發」嘅指令。


敏感字列表顯示嘅有海外民運組織同成員、八九學運領袖、境外人權機構、海外維吾爾組織、自由西藏等名稱，而中共前領導人同佢哋嘅子女名字都係敏感字。