有話說﹕繪本不是閱讀理解

【明報專訊】自從Happy Mama做咗媽媽之後，逛得最多嘅地方，已經唔再係時裝店，而係圖書館、書局，皆因MaMa有個心願，就係培育出一對愛閱讀嘅仔女，所以，MaMa經常會陪佢哋四圍去睇書。


怨功課多 仲買補充？

最近我哋一家四口又出動去書局「掃」書，有幾間書局都做緊減價，迫得水泄不通，畀錢都要大排長龍。原先MaMa都無唔開心，因為覺得香港閱讀風氣好都係一件好事，但殊不知睇真啲，家長手上一疊二疊嘅，統統都唔係課外讀物，而係各式各樣嘅補充練習。


唉，MaMa都唔明，最近全城日鬧夜鬧學校畀得太多功課，搞到學生有氣無定唞，但為乜有一班家長仲要「落井下石」，買咁多補充練習畀仔女做呢？

講番閱讀，以前MaMa比較多買故事書，但近排想試下睇繪本，希望小朋友可以感受多啲唔同嘅兒童文學作品。不過，繪本始終以圖畫為主，文字較少，有時題材又比較深，MaMa最初都唔係好識得點樣演繹畀小朋友知，又擔心佢哋睇唔明，但後來得到香港兒童文學文化協會會長霍玉英博士嘅指點，就茅塞頓開。


讀完N次 孩子自然沉澱想法

霍博士話，如果係採取親子共讀，家長只要一邊畀小朋友睇住圖畫，而同一時間用好生動嘅語調朗讀畀佢哋聽，大多數都會明白嘅，但係咪一定要明白得好深入呢？霍博士認為唔需要，家長可以將內容簡化到適合小朋友嘅程度就可以。


但最重要，係家長唔好當睇繪本係做閱讀理解，亦唔需要一次過解讀晒，小朋友今日理解到幾多，就由得佢理解幾多，因為佢哋讀一本書，一定唔會讀一次，當佢讀完N次之後，經過潛移默化、經過沉澱，就自然會得出一啲想法，呢個過程有長有短，家長要有耐性，唔可以心急。