迪士尼推$1616聖誕4人套票

【明報專訊】啱啱加咗價嘅迪士尼，為慶祝10周年，今個月起推出一系列全新表演及遊樂設施，今日起至下年1月3日，仲首推港人專享嘅「4人樂遊HK$1,616聖誕套票」，即平均每人404元，咁就抵過新票價嘅539元。


推新音樂劇 字幕得英文簡體

迪士尼今日仲會推出新音樂劇《迪士尼魔法書房》，成個表演長28分鐘，當然有大熱嘅《魔雪奇緣》，仲有經典嘅小魚仙同阿拉丁等，真係令Emily勾起唔少回憶，當中仲有幕現場演奏小喇叭同埋表演軟骨功。演員來自10個國家，除咗3、4個本地表演者，其他嚟自英國、泰國等。


迪士尼樂園娛樂表演總監周偉強話，淨係翻譯劇本都用咗兩個月，對白加入咗唔少廣東話，例如將「sir」翻譯成「阿叔」、將屁股「butt」翻譯成「pat pat」。不過，當演員講廣東話時，字幕仍得英文同簡體字，周偉強話聽得明廣東話嘅應該唔使睇字幕啦。