區選候選人「被幫忙」 V煞當街粗魯「助選」

【明報專訊】區議會選舉仲有幾日就投票，地區上有唔少光怪陸離嘅事發生。民主黨東區南豐選區候選人張國昌話，收到街坊報料話噚日見到一班戴上V煞面具、手持黃傘嘅人，用無禮滋擾嘅方式喺街上大叫「支持張國昌」。他表明唔識呢班人，呼籲街坊要警惕可疑人物喺區內出沒，有需要時就報警求助。張國昌同Emily講，都幾擔心會有不知名人物將暴力帶入區內。同區候選人有楊默及李澤深。


公民黨助選者被拍頭報警

公民黨東區康怡選區候選人梁穎敏嘅助選團隊受襲，梁穎敏發聲明話，噚日朝早喺康怡開設街站時，有助選成員被人用手拍頭，助選團報警。梁穎敏對手係黃寶兒同新民黨洪龍荃。另一邊廂，民建聯立法會議員陳克勤喺facebook貼咗張民主黨其中一個北區候選人嘅傳單，問「呢位亞哥，連投票幾點結束都唔知，搞乜呀」，原來傳單上印錯咗投票日嘅結束時間。佢唔希望幫人哋宣傳，就喺單張上key個南瓜燈落人哋個頭度。