劉皇發傳病重 政界人物紛探望 劉業強﹕阿爸好精神

【明報專訊】前晚政界流傳，家喺浸會醫院留醫嘅前鄉議局主席劉皇發（發叔）病情惡化，好多政界人士即晚趕去探病。發叔個仔、現任主席劉業強噚日出席鄉議局會議嘅時候，向大家派定心丸，話阿爸今次入院係因為患肺炎，家情况穩定，喺普通病房住緊，佢形容阿爸「好精神」，「好多人探佢」，但行動能力就未完全回復，希望佢可以喺幾日內出院。劉業強又話，阿爸之前做過小手術，但就唔肯透露係幾時做，同埋係咩類型嘅手術。


指因肺炎入院 行動不便

不過，十八鄉鄉委會主席梁福元就話，發叔喺大約半年前驗出腦部有毛病，唔係腫瘤，但都影響右腳行動，所以喺一個月前做咗腦部手術。梁福元話發叔今次入院唔係因為腦部問題，而係「感冒」要做「身體檢查」。


梁福元﹕劉月前曾做腦手術

上水鄉委會主席侯志強話自己星期日探過發叔，見到對方病牀附近無特別醫療儀器，形容發叔「精神唔錯，頭腦清晰，有問必答」，但「中氣有少少唔足」，亦感覺對方行動「唔係幾好」。被問到發叔係咪腦部有事，侯志強就答到「好多人個腦都有事啦，睇吓咩事之嘛，腦神經電波個個唔同」，話無問對方做咗咩手術。


發叔係經民聯榮譽主席，佢黨友林健鋒噚日出席電台節目嘅時候，話前日探過發叔，佢話對方面色好好，唔係病危，希望大家畀發叔休息幾日，唔使擔心。


署理行政長官林鄭月娥都關心發叔病情，話知道發叔身體早前係有問題，做過手術，雖然前日無去醫院探病，但都有向林健鋒打探有關發叔嘅情况。