輕手減持盛京 孫粗洪「隱形」

【明報專訊】香港唔少殼股聖手都作風低調，鮮會接受媒體訪問，就連自己買乜賣乜都係靜悄悄，唔係港交所（0388）有股權變動信息披露，都好難知呢班炒家做緊乜。好似有「細價股殼王」之稱嘅孫粗洪，去年底盛京銀行（2066）上市時，佢就有份用13.8億元認購1.8億股支持，今年6月底佢就以每股8.5元賣咗其中1億股，計番當日認購價每股7.56元，呢手貨已經賺咗近1億。


不過咁，雖然賣走部分貨，但孫粗洪持股比例仲有5.27%，按規定再有咩買賣都有需要披露，但係話得低調，佢又點會想大家知得咁清楚，所以上星期五竟然只係以每股9.967元沽59萬股，令佢個持股比例得番4.98%，剛好唔使再公開披露。小琴多心，孫粗洪呢個舉動，係咪意味住佢即將有啲大動作，但又唔想畀大家跟到呢？


[小琴密語]