方便落區 葉劉住酒店為黨友拉票

【明報專訊】區議會選舉星期日（22日）舉行，候選人可以話已經瞓身拉票，連政黨領袖都唔例外。


好似新民黨主席葉劉淑儀咁，雖然家住港島，但係該黨參選人，喺新界西、新界東等大有人在，作為主席嘅佢當然要幫手，葉太仲話，有時要開早，於是索性早一晚住喺新界西嘅「客棧」，即係租一晚酒店，方便可以7點幾就入到相關選區。


周六晚瞓屯門酒店

葉太話，星期日投票日，佢星期六晚都會去屯門一間酒店度瞓，等第二朝可以一早落區。


其實葉太有司機，可以叫司機車佢周圍去，點解要租酒店住咁麻煩呢？葉太就話司機家住將軍澳，叫佢先去港島再車佢去新界，司機都好辛苦，而佢覺得司機最緊要係有足夠休息，所以有時就會畀司機揸車返自己屋企，而佢有時索性自己住酒店、搭的士去第一站先，然後先再搵司機幫手。葉太都幾關注員工作息時間喎。