國泰鑽石卡客戶 揀餐有時先到先得

【明報專訊】國泰近年被批評服務「大縮水」，以前人人都有嘅暖氈，家要先到先得爭崩頭；以為做咗尊貴客戶會好啲？國泰空中服務員工會副主席丘志雄就話，唔好抱咁大期望住！

話說儲得飛行里數多，就可申請國泰會籍享尊貴服務，但隨住香港人搭飛機當搭車，國泰最高級別嘅鑽石卡乘客亦愈來愈多，丘志雄話，有時一班機有多達三分之一人都係鑽石客，令空姐好頭痕，皆因鑽石客其中一個尊貴之處，係可以率先揀飛機餐嘅主菜，但國泰嘅尊貴飛機餐數目仍然「滯後」，點餐變咗又係先到先得，遲咗啲已經冇咗「有得揀」嘅權利。


丘志雄話，每次要同啲客講「唔好意思，你已經無得揀，得番一款餐」時，都覺得好尷尬，畀唔到個客應得嘅服務。佢又話，連啲客有時都會呻國泰服務質素差咗。國泰就回覆話，會繼續同艙務員保持溝通，留意佢哋嘅意見。