屢敗屢戰屢敗 佢哋又踢唔走宿敵

【明報專訊】區選塵埃落定，每個參選人都係時候檢討賽果。本報之前報道過，有5名參選人過往兩屆區議會選舉都輸畀同一個對手，佢哋今次都唔例外，再次敗於宿敵，認真係屢敗屢戰。先講吓民主黨莊榮輝，佢第四次代表民主黨披甲出選西環選區，最終以百幾票嘅差距再輸畀民建聯張國鈞，飲恨而回。莊榮輝同Emily講，唔會輸到無感覺，今次更係最失望嘅一次，因為決心要踢走唔做嘢嘅對手，可惜唔能夠讓所有選民知道佢嘅理念。


莊榮輝嘗「最失望一次」

另一名民主黨黨員楊小壁，再次喺華貴選區迎戰麥謝巧玲，差唔夠50票贏唔到。至於同屬泛民嘅公民黨，黨友陳友昌喺九龍城愛俊輸畀報稱獨立嘅左滙雄，雖然差距比上屆小咗，但仍然輸成千票，睇嚟陳友昌要加把勁。


建制派方面，民建聯梁嘉銘出選葵青興芳，仍然無法擊敗民主黨吳劍昇，不過望落吳劍昇就有啲危機，由8年前200幾票差距，拉近至今屆只有70票差距。同屬民建聯嘅黨友余仲良再次喺元朗輸畀民主陣線麥業成，輸成700幾票。