葉榮當選 周一嶽﹕盼成殘障者榜樣

【明報專訊】平機會噚日舉辦周年公開論壇，平機會主席周一嶽被記者問到傷殘人士、工黨葉榮勝出馬鞍山頌安選區，擊敗民建聯立法會議員葛珮帆一役，周一嶽話佢認識葉榮時，葉榮係張超雄議員嘅助理，佢對葉榮當選感到「好開心」，又話睇到佢好勤力做嘢，證明殘疾人士亦可以有好表現，希望葉榮能成為其他殘疾人士嘅好榜樣。


記者又問有啲票站未能方便殘疾人士進出，佢話家嘅做法係畀殘疾者申請去其他設有無障礙設施嘅票站投票，希望日後能夠陸續改善呢個問題。


平機會論壇又介紹該會過去一年工作，包括立法保障不同性傾向人士免受歧視、倡議少數族裔學生及特殊學習需要學生嘅平等教育和就業機會等5個優先工作領域。


周一嶽話去年就歧視條例檢討做諮詢，收到12.5萬份回應，明年首季公布檢討結果，再向政府提交報告及提出建議。