辭職全力搞區選 積蓄用盡 落選傘兵急搵工

【明報專訊】唔少參選今屆區議會選舉嘅人包括「傘兵」，都辭咗工專心搞選舉工作，當選嘅可以等拎議員津貼，但唔少落選傘兵就要繼續為口奔馳，即刻上網搵工。出選觀塘康樂選區嘅東九龍社區關注組陳澤滔話，荷包用剩千幾元，再唔搵工要食風，所以用9秒9速度搜尋工作。出選中西區觀龍嘅青年新政召集人梁頌恆亦話選舉令佢「乾塘」，過幾日都要開始搵工。


傘兵阿滔為咗區選，半年前辭去迪士尼樂園嘅IT工作。佢話本來預計區選只需用2萬至3萬元，但加印宣傳單張用多咗一筆，所以使費增至4萬至5萬元，搞到佢積蓄所剩無幾。但佢話對自己能力有信心，相信搵工唔難，大不了搵freelance。至於4年後仲會唔會選，佢話4年後嘅事未決定到喎。


何俊仁發噩夢「被箍頸」

今次區選令唔少人精神緊張，包括身經百戰嘅民主黨何俊仁，Emily見佢心情似乎已紓緩不少，但仁哥話前晚瞓覺發噩夢，夢到被人追殺，最激烈嗰陣被人「箍頸」，驚醒後先發覺原來係身邊嘅老婆用手拍緊佢，真係出晒冷汗！仁哥話自己平時好少發噩夢，睇嚟真係近排工作壓力太大嘅緣故。


另一邊廂，同樣落選嘅鍾樹根同葛珮帆噚日都返立法會開會，訪京嘅民政事務局長劉江華被記者問佢有無安慰吓兩個黨友，「劉華」就話做咗局長，不適宜作具體評論，又話無論當選或落選，各候選人都相當努力，話佢哋都係希望為香港做事。