新聞博覽館擬設導賞 覓老報人說從前

【明報專訊】中區必列啫士街街市（圖）活化做新聞博覽館講咗兩年，立法會工務小組委員會噚日傾項目申請，雖然未審議完，但普遍議員都贊成，認為可以提醒公眾新聞自由嘅重要。


香港開埠以來嘅新聞史料浩如煙海，上世紀三四十年代有多份報章，雖則有啲出版幾日就無咗，但已折射出當代社會現象。Emily聽到，新聞博覽館有限公司副主席陳淑薇喺會上提到，密鑼緊鼓咁搵緊老報人口述歷史，亦有移民加拿大嘅香港人好有心，聯絡佢哋話可以捐出儲落嘅舊報紙，包括日佔時期嘅《香島日報》，到時可能有機會睇到日軍當時點樣控制輿論。


陳又話博覽館會每周開放6日，朝十晚七，周一休館，星期六、日會向公眾開放7節導賞服務，由資深新聞工作者講解，又希望可同團體合作，為長者和弱勢社群免費導賞。家全球只得美國華盛頓有Newseum，若新聞博覽館出年如期建成，到時會係全球第二大，亦係亞洲唯一一間Newseum。