蕙禎BB曾《大公》實習 青政召集人﹕唔代表咩

【明報專訊】青年新政成立至今，不時都會被批評係「鬼」，質疑青政係「黃皮紅心」早已被染紅。噚日青政召集人梁頌恆接受訪問，自爆青政有成員曾經喺左派組織同政黨工作，包括被視為女神嘅游蕙禎（圖）曾經喺《大公報》暑期實習，亦有成員喺民建聯工作過。但係梁頌恆強調「唔代表乜嘢」，佢哋入會時亦有申報過，最重要係家無政治聯繫。


now新聞台日前報道梁頌恆2007年做城大學生會會長嗰陣，同中聯辦官員交流甚密，令人覺得佢被「染紅」。梁頌恆噚日接受now新聞台專訪，回應政界中人話佢同時任中聯辦青年工作部處長張學理關係密切嘅傳言，佢話自己無因統戰而被染紅，當年喺學生會工作嘅人「無理由唔認識張學理」，形容張「經常出現」。


梁頌恆話，當年張學理嘅工作係同年輕人打交道，「如果見完就代表染紅，當時好多學生會，除咗港大，都係染紅」。梁亦細數當年3次同中聯辦官員見面嘅過程，包括每年慣例中聯辦宴請學生食飯、佢當選城大學生會會長後邀請張學理出席就職禮，同埋舉辦內地交流團時，邀請張學理隨團。