用港版護照貼紙 小心被檢控

【明報專訊】台灣早前有人自製「台灣國」護照貼紙，可以遮住護照上嘅「中華民國」，台灣行政院話呢種行為係違法，嚴重情况會被注銷護照。最近有港人有樣學樣，整咗護照貼紙，畀用家遮住護照上嘅國徽，貼紙圖案有李小龍、天星小輪、獅子山等，仲有長方形貼紙，寫住中英文嘅「香港」，可以遮住「中華人民共和國」嘅字眼。有人將貼咗貼紙嘅護照影相放上網，聲稱呢個做法無問題。


Emily問咗香港入境處，佢哋就話，任何人無合法授權而改動任何旅行證件、管有或者使用改動過嘅旅行證件，有可能觸犯《入境條例》，可能被檢控，一經定罪最高可罰款15萬同監禁14年；協助同教唆其他人做呢種事亦同樣犯罪。入境處提醒大家，使用改動過嘅護照可能會引起不便，影響順利出入境，亦有可能觸犯當地法律。


另外，《環球時報》噚日刊登咗一篇署名評論文章，題為〈罵不醒「港獨」分子，只能「打」醒〉，叫港獨者放棄特區護照，又叫佢哋簽承諾書第日喺海外遇到事，都唔好搵駐外嘅中國政府部門幫手。