美荷樓豎3米玻璃樽聖誕樹

【明報專訊】聖誕樹相信大家每年呢個時候都會見到，但由玻璃樽砌成嘅聖誕樹（圖），大家又有無見過呢？位於深水埗嘅美荷樓青年旅舍，今年特別豎立咗一棵大約3米高、以綠色玻璃樽砌成嘅聖誕樹，樽間佈滿白燈，加上懸吊喺旅舍空地上嘅燈飾，日落後瀰漫冬日浪漫氣氛。聖誕樹會由今日展出到出年1月5日，參觀費用全免。


旅舍亦會喺今日至12月19日期間嘅4個周末，舉辦免費文藝活動，包括無伴奏（A Cappella）樂團表演、人像速寫同人體彩繪藝術活動。其中無伴奏樂團會每隔半個鐘「快閃」出現，圍住訪客高歌聖誕同經典名曲，樂團成員平日工作各有各忙，今次特意抽時間為大家帶嚟愉快周末。