阿里有今日

【明報專訊】早前內地網購商京東爆料話阿里巴巴逼商家歸邊，如果商家去咗京東開舖就唔好去天貓擺檔，呢單新聞言猶在耳，近日阿里巴巴旗下阿里旅行就發微博，話攜程網規定酒店但凡同阿里旅行合作，就唔畀向攜程網埋堆。睇到呢度，身邊的友人忽然爆出了一句：「你都有今日喇！」


攜程「以彼之道還施彼身」

據內地傳媒話，攜程網號令「去哪兒」、「藝龍」旅遊網合作，但凡有公司同阿里旅行開檔，三大旅遊網就會封殺佢，第一次先警告，其後封殺3個月到半年。攜程網就「澄清」話，「攜程尊重供應商的業務選擇，攜程、去哪兒、藝龍是三家獨立的公司，都會按照自己的業務訴求應對市場」。


阿里旅行喺佢微博高調發表聲明，話阿里旅行獲悉好多酒店合作伙伴畀攜程警告，「阿里旅行不願意參與到逼迫商家站隊（歸邊）的惡性行為」。說話彷彿打倒昨日嘅自己。到底今次事件對於阿里巴巴嚟講，係巧合，定係遭報復，定係其他內地公司一早睇唔慣佢嘅行為，特登「以彼之道還施彼身」？損失一個旅遊行業，對阿里巴巴嚟講或者唔算大事，但係攜程網若然有心為之，今次令阿里巴巴多單笑料，甚至推上彭博，可能係攜程意料之內。


不過，阿里巴巴如今的地盤已經伸展到各行各業，山水有相逢，點解攜程網咁夠膽同阿里巴巴駁火？話說攜程網喺10月咁啱獲百度入股25%，即係家攜程背後有內地科網三巨頭BAT（百度、阿里巴巴、騰訊）之一的百度撐腰。但今次到底係攜程自己意思，定係百度指使，就不得而知了。


應否歸邊 阿里旅行天貓態度迥異

搞出一個大頭佛，阿里旅行喺微博咁樣答：「作為一個開放服務的平台，阿里旅行從來沒有逼迫商家站隊，也不會因此而開始逼迫商家站隊。因為共建共贏才是健康良性的行業生態。」不得不令人諗起阿里巴巴旗下天貓喺雙十一對京東嘅回應：「我們尊重實名舉報，但今天是……雞實名舉報了鴨，說鴨壟斷了湖面。」