AIA推介會 保安粗野推記者

【明報專訊】近排除咗新地（0016）「郭氏風雲」之外，新股都係市場焦點。「巨無霸」友邦保險（1299）壓軸出場，就更加將新股熱潮升溫。噚日，友邦投資（AIA）推介會現場，氣氛唔止熱烈，直情係「㷫烚烚」，記者同酒店保安，仲多次「擦出火花」添。

話說友邦噚日喺金鐘香格里拉酒店，搞投資者推介會，傳媒照例到場，想話認識吓來參加嘅投資者，問吓佢哋意見。新股嘅公關公司，以至公司管理層，一般都歡迎記者到場，在上市前做吓宣傳。不過，友邦嘅推介會就一反常態，現場酒店保安嚴密不在話下，當記者趨前同投資者交換名片，酒店保安竟然走埋嚟阻止，出手推開記者，令記者以至投資者都非常愕然。

新股推介 罕見如此「排場」

記者見勢色唔對，都好忍讓，轉移陣地至會場樓上一層嘅酒店大堂，繼續同投資者溝通。誰不知，酒店大堂嘅保安大哥，又再出手，一時話呢度係私家地方，一時又話成個場都畀友邦包起，仲直接話「呢度唔歡迎你」。

其實做得傳媒呢行，記者都慣於面對呢啲不禮貌對待，只不過新股推介場合就好少遇到呢種情况，可能作為今年最大型新股，友邦嘅「排場」要特別過人啦。

報料電郵﹕piano@mingpao.com