馮煒光拍片 自爆當街被人鬧

【明報專訊】新聞統籌專員馮煒光言論向來惹火，估唔到連出街都會畀阿叔鬧。馮專員噚日喺facebook上載短片，係佢喺街頭被一個唔認識嘅阿叔鬧，雖然馮煒光被人鬧，但亦好似一般網民咁立即用手機拍片。片段中該名叔叔見到馮煒光拍片就絕不客氣，仲叫佢「掟埋上網啦，又用你金鍾仁嗰啲咩衰名啦……全香港居民都唔歡迎你呀」。


馮煒光亦不甘示弱，澄清自己曾經係民選區議員，阿叔就話如果佢咁叻，就唔會「畀人踢落樓」啦。馮煒光當然否認，但阿叔仍繼續鬧佢，相信馮煒光同人鬧交鬧到一直企喺馬路，有司機就「響按」提佢，條片持續兩分鐘，直至馮煒光自己熄機為止。佢喺fb話，自己喺街頭等的士，「忽然被這位先生辱罵（我既不認識他，也絕無挑釁他）。香港為何會變成這樣？」