聯想「鐵娘子」 5日勁賺383萬

【明報專訊】近排股市表現強勁，相信唔少股民都有斬獲，有「聯想鐵娘子」之稱嘅馬雪征，亦唔執輸，最近短炒聯想（0992），短短5日即獲利約383萬港銀，認真和味。

仍持1.4億元股份

小琴噚日睇到港交所資料顯示，現任聯想非執行董事嘅馬雪征，喺10月4日沽出317.2萬股聯想，每股平均作價4.807元，套現1525萬元，而早喺佢沽貨之前嘅5日，馬雪征啱啱行使咗認股權，認購咗呢批317.2萬股，每股作價係3.6元，即認購嘅成本價係1142萬元，認購咗股份僅僅5日後，就即買即食糊，可謂快槍手。

食咗糊之後，馬雪征仲持有聯想2866萬股，用噚日收市價4.93元計，市值1.42億元，名副其實係「億元富婆」。