4點鐘許sir調任指揮官 O記阿頭接掌PPRB

【明報專訊】警隊每年12月公布新一輪晉升及人事調動安排，Emily 聽聞警隊內部已定出會有15人晉升總警司，並有5人升任助理處長，包括西九龍總區副指揮官余達松、灣仔區指揮官鄭耀武、水警總區副指揮官何德承、港島總區副指揮官卓孝業，以及目前被派往英國深造嘅Madam林曉彤。助理處長李建輝就會升做高級助理處長，接替退休嘅羅夢熊。


5人將升助理處長

與此同時， 警察公共關係科（PPRB）都有變動，Emily聽講現時O記「阿頭」總警司區展秋，將會喺下月調任做PPRB主管；而喺佔中期間廣為市民認識嘅「四點鐘許sir」許鎮德，就會調到深水埗做指揮官。至於PPRB no.2、高級警司關翠貞，由於將晉升總警司，故稍後都會調離PPRB。現時警隊facebook有許sir化身卡通人物嘅環節，故聞說隨住許sir工作崗位轉變，fb或會有其他新環節推出。


區展秋係虔誠基督徒

Emily睇番資料，區展秋係典型CID幹探類型，做過油尖反黑總督察，主理O記時調查過唔少大案，如劉進圖遇襲案、政改表決前嘅亞視舊廠房炸藥案。另外，網上資料顯示，區sir係虔誠基督徒，曾接受教會節目訪問，講起查案時難免要投入賊人嘅思考去追查，故做警察定力好重要，又有講到2008年WTO時做談判組嘅難忘故事。另外，喺基督教刊物都有講區sir辦過「紅黑皇佈道會」，與藝人王祖藍、鄧萃雯都有合作。