城大基金晚宴 校長郭位行catwalk

【明報專訊】今時今日籌款唔容易，好似香港城市大學基金上星期四舉行周年晚宴，校長郭位同校董會主席胡曉明都要拋個身出嚟表演娛賓，其中郭位更聯同幾個副校長放低嚴肅一面，做model齊齊行catwalk。當晚城大總共籌得236萬元，會用於成立種子基金，資助城大學生創業。


籌236萬 將資助學生創業

今次係城大基金首次舉行周年晚宴籌款，當晚有逾200人出席，晚宴開始無耐，城大學生演奏音樂，著住灰色褸嘅郭位就行住catwalk咁進入會場，引嚟全場歡呼聲，秘書長林群聲教授同多名副校長亦陸續進場，喺舞台上儀態萬千地展示新裝。


至於胡曉明同城大基金榮譽副會長兼城大校友張德熙，就選擇開金口，兩人分別獻唱《心碎了無痕》及My Prayer，令全場氣氛高漲，之後兩人更合唱《愛情陷阱》，成場晚宴搞到好似開演唱會咁，觀眾揮動燈牌，又上台獻花。