政助約方國珊飲嘢 趙家賢：點解唔約我

【明報專訊】特首梁振英（CY）喺區議會選舉後講過，願意邀請年輕人加入諮詢架構，官員亦希望約吓新當選人傾偈。政制及內地事務局副局長陳岳鵬（Ronald）早前就透過facebook，希望約大坑當選人楊雪盈「出來飲杯嘢，傾偈交流一下」，呢個私下嘅對話被公開，唔少網民都質疑，陳岳鵬似乎係想追女仔多啲。


唔知係咪見同事被人講到咁，噚日民政事務局政治助理徐英偉（Caspar）就出post撐吓，佢話眼中嘅好議員無分黨派或政治立場，只有係關心社區、願唔願意將社區聲音利用選民畀佢哋嘅區議員身分做好橋樑角色，同政府溝通。佢話今時今日工作愈來愈難做，要做好官民溝通亦唔容易，仲笑言「以後啲工作安排都係先同老婆報定案，避免會家變」。撐同事之餘，Caspar亦不忘抽吓水，唔通佢都覺得Ronald咁約人真係似追女仔，容易惹誤會？


Caspar及後又上載一張同Ronald、西貢區議員方國珊嘅合照，仲話「剛剛約咗一位熟悉社區的議員遲啲落去區飲杯野（嘢）」，仲搞到民主黨趙家賢好「葡萄」，留言問﹕「哈，又唔見你哋約吓連續兩屆香港島的泛民票王出嚟？」見到趙家賢講到咁，Caspar當然回覆問吓趙家賢幾時得閒啦。