有話說﹕小學概覽資料未必真

【明報專訊】自行收生階段放榜已告一段落，今年有43%適齡學童在「自行分配學位階段」獲得心儀學校取錄，數字睇落好似偏低，但Mama身邊都有唔少朋友「得咗」。有弟妹跟尾嘅父母尤其開心，仲話以後幾年都唔使再煩，因為將來細佬妹就係阿哥家姐讀緊嗰間學校嘅「必收生」，真係戥佢哋高興。


選小學需符子女特質

無可否認，每次派位都有人歡喜有人愁，Mama朋友堆中變成「阿愁」嘅家長亦唔少，既然自行階段失敗，就要好好部署下年嘅統一派位。當下最緊要就係清楚自己區內每間小學，睇下邊間最適合你嘅小朋友。對於選校，Mama嘅朋友都幾多疑問，例如阿陳太話阿女坐唔定，擔心若然揀間口碑好但功課多的學校，日日督促佢做功課會影響親子關係；然後阿李太又話唔想個仔成日要應付測驗考試，好想佢有個快樂小學生活，要揀間happy school。


問家長探路 有子女入讀最準

對於以上難題，Mama當然要搵專家傾下。唔少家長選校時，都會上網睇小學資料，除咗學校網站之外就係瀏覽小學概覽，例如了解下學校一年有幾多次考試咁。但係Mama同明報前教育組組長梁永樂傾偈時，佢話原來小學概覽嘅數字未必反映真實情况。「有學校話每學年有四次考試，家長以為唔算多，但原來考試以外仲有幾次評估，而且仲會計落總成績。」所以阿樂話，最實際係直接打電話去問學校，有幾多考試、測驗、評估，會唔會計落總分等。


當然如果你人面廣，搵有仔女喺學校裏面讀緊嘅家長問就最準確。Mama都覺得用家感受先係最真，家長係時候探下路，問多幾個朋友意見，唔好等仔女入咗唔啱心水嘅學校先來後悔。