爆冷贏郭必錚 街坊催莫建成議辦外擺酒

【明報專訊】區選落幕，唔少當選嘅新丁都忙於籌備開辦事處。今屆喺觀塘爆冷擊敗民建聯郭必錚嘅民主黨莫建成（圖），就同房屋署講咗，希望將來能接收郭必錚現時嘅舖位做議辦。34歲嘅阿成之前一直忙區選，當選後唔少人都叫佢應該同女朋友拉埋天窗，有街坊仲提議佢可以喺將來嘅議辦外結婚擺幾圍，阿成講笑話呢個建議都有得諗。


Emily噚日撞到阿成，梗係恭喜吓呢位新丁，阿成話事前大家都預咗佢輸多贏少，因為郭必錚之前已擊敗民主黨多次，地區實力雄厚，所以阿成贏番一次，區內民主黨支持者都好開心。


阿成又話，選舉期間飲嘅湯水可能係佢過去10年嘅總和，佢話街坊好熱心，試過有街坊打電話畀佢，話喺茶樓開咗位，要佢一齊去食飯；有街坊晚飯時間搵佢，話屋企煮咗飯，請佢上去食。選舉當日，佢收到街坊嘅參茶、湯、涼茶等，街坊仲怕佢唔記得飲，送湯水之後會補多個電話提醒佢。