中策組聘雷競璇研「特別項目」

【明報專訊】Emily近日發現特區政府嘅智囊團中央政策組，有新成員獲委任為顧問，就係曾於1980年代研究本港政治制度嘅權威學者之一雷競璇（圖）。中策組仲喺網站上註明，雷競璇係負責「特別項目」（Special Project Director，顧問（特別項目）），令人諗到底係乜嘢特別任務？


Emily問過中策組「特別項目」係乜，但就無回應，淨係話雷博士係一位資深學者，喺多間大專院校從事研究歷史、政治體制、文化議題超過20年，又話雷博士曾協助首席顧問邵善波做多項特別研究項目。發言人又話，雷博士今個禮拜一已正式返工，職位係按現行做法開設嘅任期12個月非公務員職位，職級與政府首長級薪級第3點人員相若，即每個月18萬薪金。


雷競璇係早期研究香港政治制度嘅學者，編著過多本有關選舉及本港政治嘅書，例如佢與鄭宇碩合著嘅《香港政治與選舉》。雷競璇1974年畢業於中大歷史系，其後留學法國修讀政治，返港後任教中大及城大。