出席梁粉論壇 點名毛孟靜 CY話陳太論壇少人去

【明報專訊】特首梁振英（CY）由競選至今，一直有「梁粉」喺建制之外幫佢做事，齊心基金係主要機構之一，佢哋前晚就舉辦咗個題目為「特區施政的挑戰與前瞻2015」嘅論壇，CY喺兩節論壇答咗唔少問題。噚日梁粉網站「港人講地」就剪輯部分片段擺上網，報道CY有講成立文化局需要搞掂「拉布」問題，又透露《施政報告》希望有嘢推動中下游科研「真正落地」。


Emily聽聞，當晚CY提到唔少泛民人士嘅名，港人講地噚晚就未有報道。據聞CY當晚又提及公民黨毛孟靜，話說有旅遊業界人士提到生意跌，CY就回應話，覺得輿論聲音要做好啲，呼籲大家多發聲，好似如果油尖旺區再出現毛孟靜拖篋呢類行為，咁就應該透過商會發聲，唔使擔心個別商戶出聲會被人挑戰咁話。


談及青年問題，CY特別提到青年人多樣化，點名指前政務司長陳方安生上星期六出席有關管治問題嘅論壇，可能因為係朝早就少人到，但早前CY自己有份出席嘅就業諮詢活動，一早就有300個青年著晒西裝出席。


設文化局 要先阻拉布

有與會者建議政府成立文化創意辦公室，CY就話佢更想成立文化局，但當務之急係要有足夠票數阻拉布。佢形容如果因為立法會投票，少數服從多數下否決成立文化局，佢「心甘命抵」，但家變成因拉布出現多數服從少數，佢就「心有不甘」。據聞CY明言下年選舉希望大家投票發聲，解決拉布問題。


Emily聽聞呢個齊心論壇，出席者要1000蚊一位，但就擺咗約十幾圍枱，唔少都係「梁粉」，好似曾為梁振英競選嘅劉炳章、紀文鳳、羅范椒芬，以及建制區議員。