日前批掛住去睇象 象哥撐EQ立會救大象

【明報專訊】民建聯葛珮帆（EQ ）早排區議會選舉輸咗，黨友「象哥」黃定光話EQ成日去非洲睇大象，「救到我（象）但救唔到自己」，又叫EQ唔好選輸就「賴地硬」。不過，EQ同象哥似乎無面阻阻，EQ依然故我喺立法會提出議案，要求政府打擊走私野生動物，而「象哥」亦肯企喺EQ身邊舉標語牌，話支持EQ喎。


EQ同Emily講，象哥同佢講，早前批評佢嘅說話其實只係講吓笑，仲話象哥表明一直支持佢，特別係保育「大象」。


EQ就話，根據保護野生動物組織嘅調查，每年因走私象牙而被非法獵殺嘅非洲大象有3.3萬隻，搞到大象數目暴跌至只剩47萬隻，而走私犀牛角、魚翅等更導致部分物種瀕危，所以佢要求政府採取措施打擊非法買賣活動，包括禁止象牙及瀕危物種產品嘅貿易。呢個議案排到今日辯論。


不過，EQ都同意象哥嘅講法，搞保育野生動物嘅議題難爭取選票支持，而佢只能做覺得應該做嘅事喎。