議員獻肉臂 高永文打流感針「好手勢」

【明報專訊】雖然這個冬天不太冷，但市民仍要提防冬季流感。噚日立法會大樓變咗臨時醫護間，有27名立法會議員「赤膊上陣」，接種季節性流感疫苗。其中民建聯鍾樹根同民主黨單仲偕（單雞）係首次接種疫苗，而人民力量陳偉業（大嚿）就同新民黨田北辰主動要求食衛局長高永文親自打針，並「交足戲」扮痛。民建聯陳恒鑌就緊捉住高永文嘅手唔放，好似好緊張咁。


入政府後3年無行醫

高永文坦言加入政府後已經3年無行醫，不過田二少打完針後就大讚高醫生「好手勢」，大嚿都話好似「蚊叮咁」，一啲都唔痛，睇嚟「重出江湖」嘅高醫生手勢都keep到。不過單雞笑言搵醫生打針「非常不智」，因為護士先係每日負責打針嘅人，更安全熟手，佢話唔會為咗博出鏡而冒險。


唔止立法會議員，特首梁振英噚日亦連同5名局長一齊接種疫苗，高永文早前亦已同醫管局高層接種咗疫苗。高永文話希望官員同議員以身作則，引起市民關注，鼓勵大家多打流感疫苗。


高永文話政府已買入40萬劑流感疫苗，現時經政府注射嘅有4萬多人，私家診所接種嘅就有12萬人，比去年同期稍高。佢預料當冬季來臨，天氣真正轉冷，12月至1月會係流感高峰期。