張宇人想考察美食車 又遇阻滯

【明報專訊】財政司長曾俊華於今年初財政預算案中提出引入外國流行嘅美食車，近期成件事就好似被遺忘咗咁，無再點提過。原本立法會食安及環境衛生事務委員會計劃咗9月組團去美國考察美食車運作，但因為反應冷淡、人數不足而泡湯。積極提出組團嘅飲食界張宇人（Tommy）無放棄，打算明年3月8日再出擊，仲定埋具體行程，諗住去紐約及三藩市等地學習。佢又話，民主黨黃碧雲提出希望喺行程中約美國官員講吓食水安全。


不過，今次美食車嘅如意算盤可能又胎死腹中，事關政府嚟緊會喺立法會提出具爭議嘅港珠澳大橋及高鐵追加撥款，當然要建制派議員坐定定支持。財委會主席陳健波仲定咗死線，希望3月底前可以完成審議，睇嚟Tommy都好難行得開。但上屆做財委會主席嘅佢笑言，財委會只需8人就夠開會，自己帶走幾個應該無問題。