吸年輕人 樹根考慮改髮型衣著

【明報專訊】民建聯鍾樹根喺區選意外落敗，輸畀徐子見，有市民就去佢喺東區漁灣嘅辦事處「贈興」。鍾樹根接受網媒《堅料網》訪問，承認敗選其中一個原因係忽略咗年輕首投族嘅重要，所以自己未來會適當咁年輕化，包括考慮轉吓髮型，如果著T恤加件西裝褸，「或者會有唔同睇法」。


落選或因「唔識去奸」

樹根話其實喺選舉期間已經意識到有危機㗎喇，但支持者覺得佢「瞓喺度都會贏」，警覺性不足，話連立法會主席曾鈺成都問佢「會輸㗎咩」。佢話自己落選亦可能係因為「個人太直率，唔識去奸」，所以以後會圓滑啲，喺某啲情况下留有餘地。佢話落選後最唔開心嘅，係有市民「慶祝」佢落敗，認為佢哋唔應該攻擊自己嘅同事同屋企人，不過佢話會當呢啲辱罵係鍛煉。被問到「樹根」呢個名不時畀人挖苦，會唔會考慮改名呢？樹根直截了當話唔會，因為支持佢嘅人都覺得呢個名好記，就好似樹根咁四圍服務。