書+雜誌+刊物 吳克儉：月睇30本濕濕碎

【明報專訊】教育局長吳克儉上月講過「要求自己每個月睇30本書或者雜誌」，又話搭一程長途機就可以睇到十幾本，令唔少人嘖嘖稱奇，局長噚日出席一個生涯規劃嘅活動致辭時又重提事件。佢話自己喺1976年大學畢業後，曾向自己許下承諾，每個月要睇30本書、雜誌「同埋刊物」，「講得清楚啲呀」；佢仲教大家計數，話一星期讀6本周刊，4個禮拜計已經讀完24本，所以30本係「濕濕碎啦」。


吳局長又提及，早前食飯睇過一本內地雜誌《今日中國》，先知道中國作家喺世界科幻小說嘅領域取得佳績；佢話，有人覺得每日睇一本書好辛苦，佢反問每日都要食一份早餐、午餐同晚餐，係咪又覺得辛苦，引得台下嘉賓大笑。唔知嘉賓係笑局長個比喻，定係笑啲一個月睇唔夠30本「書」嘅人呢？


對於局長睇雜誌刊物當係睇書之說，Emily見唔少網民質疑局長連書同雜誌都唔識分，又有人話，圖書館分類嗰陣，可以直接將書同雜誌擺埋一齊，橫掂喺局長眼中書同雜誌種類都係一樣。