西九試水溫 明年首個展館開幕

【明報專訊】西九文化區M+博物館2019年開幕前，M+已開始咗「M+進行」系列嘅流動式展覽試水溫。年底離任嘅M+行政總監李立偉噚日主持呢個系列嘅第九次展覽，叫做「M+進行﹕藝活」，佢致辭時透露西九首個小型藝術展館明年7月開幕，打頭陣嘅係早前代表香港參與威尼斯視藝雙年展嘅本地藝術家曾建華，佢喺當地展出嘅「無盡虛無」展覽會喺明年8月舉行回應展。


Emily仲聽聞，小型藝術展館改咗個新名「M+展亭」，李立偉話明年初舉行最後一次流動展覽後，就會改為喺呢個展館辦恆常展覽。


展覽「藝活」由今日起至本月20日喺8個地點展出，包括城大、新光戲院、牛棚藝術村及西九文化區等，有10個本港、內地、韓國等藝術家參與，包括展出日本藝術家尾竹永子喺福島輻射區周邊演出嘅相片，亦有內地藝術家林一林再次利用《基本法》表演，今次佢用好多張印咗基本法嘅紙，編成一條巨大嘅繩索拔河。Emily問M+總策展人鄭道鍊怕唔怕展覽太政治敏感，佢話做得現代藝術就「冇得避（政治）㗎啦」，會撐呢批藝術家。