六成人四圍「撲水」 團體籲港鐵站設水機

【明報專訊】為咗響應環保，好多市民都會自備水樽，減少用塑膠樽，公民黨就喺9月用電話訪問咗1148名市民，有33%受訪者每日都會自己帶水樽外出，偶然會帶水樽嘅亦有32%，但有65%人認為唔夠公共飲水機，令佢哋要四圍去「撲水」。


公民黨立法會議員郭家麒就同Emily講，2014年全港每日平均棄置約528萬個膠樽，數量驚人；調查又發現有66%受訪者知道用膠樽唔環保，但佢哋因為搵唔到飲水機，絕大部分人仍然會飲用膠樽飲品。佢建議政府可以喺圖書館、博物館同巴士總站安裝飲水機，鼓勵市民帶水樽外出。


民間團體「撲水」發起人彭凱恩亦都話，全港只有約800部水機，但大部分喺康文署嘅運動場入面，唔方便市民用，建議政府可考慮喺全線港鐵站增設飲水機。