從「波子迷宮」找靈感 中大生寫App助活躍症童奪冠

【明報專訊】唔少人覺得「打機」令細路仔分心，不過最近一班大專生參加咗協康會同三星合辦嘅比賽，研發手機App畀患有專注力失調及過度活躍症（ADHD）嘅學童，針對佢哋嘅弱點設計遊戲，以訓練同改善佢哋嘅專注力。中大計算機科學系4個三年級學生，憑住將兒時玩意「波子迷宮」電子化，奪得比賽冠軍。


葉嘉信、司徒信傑、梁敏灝同林偉堃噚日喺頒獎禮話，曾經探訪ADHD學童，發現學童容易分心、短暫記憶力同自制能力比較弱。葉嘉信解釋，搵迷宮出路需時，希望令小朋友坐定定完成目標，而記住迷宮路線就可加強短暫記憶力，控制平板電腦傾斜去改變波子方向就有助改善手部肌肉協調。佢哋希望透過遊戲改善學童生活能力，估計程式最快明年初面世，免費畀學童使用。